काठमाडौँ– काठमाडौँ उपत्यकासहित देशभरी चिसो बढेको छ । वायुमण्डलको प्रभावले काठमाडौँ उपत्यकामा गत वर्षको तुलनामा यस वर्ष बढी चिसो भएको मौसम पूर्वानुमान महाशाखाले बताएको छ । उपत्यकामा मङ्गलबार र आज बुधबार ८ डिग्री सेल्सियस तामक्रम रहेको छ ।
लामो समयसम्म पानी नपरेकाले धुलोका कारण वायुमण्डलिय प्रदूषण बढेपछि चिसो बढेको मौसमविद्ले जानकारी दिए । सिजनल इफेक्ट(मौसमी प्रभाव)ले न्यूनतम तापक्रम तलमाथि भइरहेको हो । तापक्रम घटेपछि उपत्यकामा बढी चिसोको महसुस गरिएको छ ।
मौसमविद्का अनुसार अबको केही दिनमै तराई क्षेत्रमा पातलो कुहिरो लाग्ने छ । पहाडी क्षेत्रमा लामो समय पानी नपरेका कारण तुवाँलोले दृश्यता कमजोर भएको छ ।
अहिले पानी पर्ने कुनै सम्भावना नरहेको तथा नेपाली वायुमण्डलमा पश्चिमी वायुको प्रभावसँगै जाडो याम शुरु भएको महाशाखाले जनाएको छ।
केही दिनदेखि दिउँसोको तापक्रमसमेत २ देखि ३ डिग्री सेल्सियसका दरले घटिरहेको छ । यस्तो अवस्थामा सुधार नआए केही दिनमै ह्वात्तै जाडो बढ्न सक्ने बताइएको छ । तापक्रम क्रमशः घट्दो क्रममा छ ।
