nepalese women football team

काठमाडौं— २८, माघ ।

नेपाली राष्ट्रिय महिला फुटबल टिमले भारतविरुद्ध ऐतिहासिक जित हासिल गरेको छ । भारतको भुवनेश्वरमा जारी हिरो गोल्डकप महिला फुटबलमा नेपालले घरेलु टिमले भारतमाथि २–१ को ऐतिहासिक जित हात पारेको हो ।

कालिंगा रंगशालामा हिजो साँझ भएको खेलको पहिलो हाफमा नेपालका लागि दुवै गोल सावित्री भण्डारीले गरेकी हुन् । सुरुवाती पाँचौ मिनेटमै भण्डारीले गोल गर्दै नेपाललाई अग्रता दिलाएकी थिइन् । त्यसको दुई मिनेटपछि भण्डारीले नै नेपालका लागि अर्को गोल गर्दै खेललाई २–० को स्थितिमा पुर्याइन् । खेलको अन्त्यतिर अर्थात् ८४ औं मिनेटमा भारतकी रत्नबाला देवीले सान्त्वना एक गोल फर्काइन् ।

भारतको सिनियर महिला टोलीविरुद्ध नेपालले जित निकालेको यो नै पहिलो पटक हो । नेपाल र भारतबीच अहिलेसम्म ९ पटक प्रतिस्पर्धा हुँदा सात खेलमा भारत विजयी भएको थियो भने एक खेल बराबरीमा टुंगिएको थियो ।

जारी हिरो गोल्डकपमा चार टिम सहभागी रहेका छन् । प्रतियोगितामा नेपालले पहिलो जित निकालेको हो । यस अघिको खेलमा नेपाल म्यानमारसँग ३–० ले पराजित भएको थियो ।

फाइनल प्रवेशका लागि नेपालले बुधबार हुने समूह चरणको अन्तिम खेलमा इरानलाई हराउनै पर्नेछ भने भारत र म्यानमारले कम्तीमा बराबरी खेल्नुपर्ने छ । म्यानमारले भारतलाई पराजित गरेको खण्डमा पनि नेपालको फाइनल यात्रा पक्का हुनेछ ।

नेपालमा आयोजना हुने पाँचौ महिला साफ च्याम्पियनसिपको तयारीमा जुटेको नेपाल अन्तर्राष्ट्रिय अभ्यासका लागि हिरो कपमा सहभागी भएको हो ।

LEAVE A REPLY

Please enter your comment!
Please enter your name here