आइत, जेष्ठ १३, २०८१
Sun, May 26, 2024
Shadow

को बन्नेछ नेपाल आइडल सिजन–२

काठमाडौं, पुस-६ ।

‘नेपाल आइडल सिजन–२ को ग्रान्ड फिनाले हुन अब केही घण्टा मात्रै बाँकी रहेको छ । ग्रान्ड फिनालेको समय जति छोटिँदैछ त्यति नै सिजन–२ को विजेता को हुनेछ भन्ने कौतुहलता बढ्दैछ ।

३६ वटा श्रृंखला प्रशारण गरिसक्दा नेपाल आइडल सिजन–२ फिनाले राउण्डमा पुगेको छ । नेपाल आइडल सिजन–१ मा तीन जनालाई फिनालेका लागि प्रतिस्पर्धा गराएको नेपाल आइडलले दोस्रो सिजनमा चार जनालाई फिनालेमा उतार्दैछ ।
फिनालेमा पुग्नेमा पोखराका विक्रम बराल, झापाका सुमित पाठक र अस्मिता अधिकारी तथा धनगढीका रवि ओड रहेका छन् ।

यी चार मध्ये नेपाल आइडल सिजन–२ मा कसले बाजी मार्ने हो, त्यो शुक्रबार साँझ ५ बजेसम्मका लागि खोलिएको भोटिङले निर्धारण गर्दैछ । त्यसैले अहिले नै यही विजेता बन्छन् भनेर भन्न सकिने अवस्था देखिदैन ।
उत्कृष्ट चार जना छनोट गरेपछि आयोजकले प्रतिस्पर्धीलाई भोटिङका लागि होम टाउन पठायो । होम टाउन पुगेका प्रतिस्पर्धीले छिमेकका ठूला-ठुला सहरहरुमा समेत भोटका लागि अपिल गर्न भ्याए । उनीहरुले घरलाई भन्दा पनि दर्शकलाई ज्यादा समय दिएको अर्को श्रृंखलामा देखाइयो ।

गतवर्ष कतारमा सिजन–१ को ग्राण्ड फिनाले आयोजना गरेको नेपाल आइडलले यो वर्ष नेपालमा फिनाले गर्दैछ । ललितपुर पुल्चोकस्थित इन्जिनियरिङ कलेजमा शुक्रबार साँझ ६ बजेबाट सिजन–२ को फिनाले सुरु हुँदैछ । ५ सय, एक हजार, १५ सय र २ हजार दरका टिकट बिक्री गरेको नेपाल आइडलले ई–सेवामार्फत टिकट काट्ने व्यबस्था मिलाएको छ ।

‘नेपाल आइडल’ को निर्णायकका रुपमा न्हु बज्राचार्य, कालीप्रसाद बास्कोटा र इन्दिरा जोशी रहेका छन् । सिजन-१ मा पनि उनीहरु नै निर्णायकको भुमिकामा थिए । होस्टको रुपमा गत सिजनमा सुशील नेपाल र रिमा विश्वकर्मा रहेकोमा अहिले सुशीलको ठाउँमा आशिफ शाह रहेका छन् ।
सिजन-१ मा गाला राउण्डमा पुगिसकेपछि दर्शकको भोटका आधारमा प्रतिस्पर्धीको निर्णय गरिएको थियो । तर, यो सिजनमा भने परिमार्जन गरेर गाला राउण्डमा पनि निर्णायकमा ५० प्रतिशत अधिकार राखेर प्रतिस्पर्धा सन्चालन गरिएको छ ।
‘नेपाल आइडल’ सिजन–२ का विजेताले नगद रु. २२ लाख, एउटा होन्डा डब्लूआर–भी कार, एउटा गीति एल्बमको सम्झौता र वर्ल्ड टुरको अवसर पाउने छन् ।

Leave a Reply

Your email address will not be published. Required fields are marked *