बिहि, मंसिर ४, २०८३
Thu, November 19, 2026
Shadow

मेयर, उपमेयर र गाउँपालिका अध्यक्षकाे पद धरापमा

नेपाल कम्युनिष्ट पार्टी (नेकपा) का स्थायी कमिटी सदस्य योगेश भट्टराईले पार्टीको आचरणअनुसार काम नगर्ने मेयर, उपमेयर, गाउँपालिका अध्यक्ष वा उपाध्यक्षहरुलाई पार्टीले पदबाट हटाउन सक्ने संकेत गरेका छन्। प्रधानमन्त्री केपी शर्मा ओलीको गृहजिल्ला झापामा आयोजित एक कार्यक्रममा निवर्तमान पर्यटन मन्त्रीसमेत रहेका भट्टराईले आफूहरूले नेतृत्व गरेको नेकपा नै मूल पार्टी भएको उल्लेख गर्दै स्थानीय जनप्रतिनिधिले पार्टीको आचरणअनुसार काम गर्नुपर्ने बताएका हुन्।

पार्टी संस्थापनतिर नलागे स्थानीय तहका जनप्रतिनिधिसभाका पद नै धरापमा पर्नसक्ने भट्टराइको भनाइ छ। ‘म स्थानीय तहका जनप्रतिनिधि साथीहरूलाई भन्न चाहन्छु, पार्टी विभाजन भयो भने तपाईं कुन पार्टीको हो? सूर्य चिह्न हामीसँग हुन्छ, पार्टीको नाम हामीसँग हुन्छ, हँसिया–हथौडा चिह्न हामीसँग हुन्छ,’ उनले भने, ‘तपाईंले दलसम्बन्धी कानुन पढ्नुभएको छैन भने स्थानीय तहका साथीहरू गएर पढ्नुहोला । यदि तपाईंले दलको आचरणविपरीत काम गर्नुभयो भने पार्टीले हटाउन सक्छ। पार्टी सदस्यबाट मात्रै होइन, फलाना ठाउँको मेयरबाट, फलाना ठाउँको गाउँपालिकाको अध्यक्षबाट पनि हटाउन सक्छ ।’

नेकपाको आधिकारितालाई लिएर निर्वाचन आयोगमा दुवै पक्षले दाबी प्रस्तुत गरिरहेका बेला भट्टराईले विभाजनमा ओली समूहमा लागेका जनप्रतिनिधिको पद धरापमा पर्न सक्ने चेतावनी दिएका हुन्। ‘तपाईं सूर्य चिह्नबाट लडेको हो भने सूर्य चिह्नको पार्टीमा आउनुस् । होइन, हामी भड्खालोमा जान्छौँ भन्नुहुन्छ भने जानुस्। तपाईंको ठाउँमा उपमेयर होलान्, उहाँले गरिहाल्नुहुन्छ नि ? तपाईंको ठाउँमा उपाध्यक्ष होलान्, उहाँले गर्नुहुन्छ नि ? त्यो पनि हुनुभएन भने सिनियर वडाध्यक्ष उम्मेदवार छन्, के फरक पर्छ ?’ उनले भने।

भट्टराईले कानुन थाह नभए आजै गएर पढ्न अनुरोध गर्दै आफूले धम्की दिएको नभई सम्झाएको पनि उल्लेख गरे। उनले अगाडि भने, ‘मेरो दायित्व तपाईंहरूलाई सम्झाउने हो। कतिपय ठाउँमा उपमेयर साथी तयार भएर बस्नुस्, मेयर हुँदै हुनुहुन्छ छिट्टै।’ नेकपामा प्रभावशाली नेता मानिनुहुने भट्टराईको भनाइअनुसार झन्डै डेढ वर्ष कार्यकाल बाँकी रहेका स्थानीय जनप्रतिनिधिको पद नेकपाको विभाजनसँग प्रत्यक्ष जोडिने देखिएको छ। यससँगै पार्टी विभाजन हुँदा त्यो पार्टीबाट निर्वाचित स्थानीय तहका जनप्रतिनिधिको हैसियत के होला ? भन्न प्रश्न स्वभाविक रुपमै उठ्नेछ ।

Leave a Reply

Your email address will not be published. Required fields are marked *