शुक्र, मंसिर ५, २०८३
Fri, November 20, 2026
Shadow

 महेश गोदारको “जाहेरी नलिए अग्निदाह” चेतावनीपछि प्रहरी सक्रिय -मुद्दा दर्ता

विवाह भोजमा भएको भनिएको जातीय विभेद प्रकरणमा व्यापक दबाब र विवादका बीच अन्ततः नेपाल प्रहरी मा जाहेरी दर्ता भएको छ।

समाजमा चर्चाको विषय बनेको उक्त घटनामा पीडित पक्षले दिएको उजुरी लामो दबाब र पहलपछि प्रहरीमा औपचारिक रूपमा दर्ता भएको हो। जाहेरी दर्ता भएसँगै घटनाको अनुसन्धान प्रक्रिया सुरु भएको प्रहरीले जनाएको छ।

यसअघि पोखराका कलाकार तथा राजनीतिकर्मी महेश गोदार ले जातीय विभेदसम्बन्धी घटनामा जाहेरी दर्ता गर्न ढिलाइ गरिएको आरोप लगाउँदै कडा संघर्षको चेतावनी दिनुभएको थियो। न्याय नपाए जिल्ला प्रहरी कार्यालय कास्की अगाडि अग्निदाह गर्ने घोषणा समेत उहाँले गर्नुभएको थियो।

घटनाको पृष्ठभूमि

फागुन ९ गते पोखरा महानगरपालिका–२६ स्थित एक विवाह भोजमा सहभागी भएका सन्तबहादुर विश्वकर्मामाथि जातीय आधारमा अपमानजनक व्यवहार गरिएको आरोप लागेको थियो।

जाहेरीका अनुसार भोजमा सामूहिक रूपमा बसेर खाना खान नदिई छुट्टै व्यवस्था गर्न भनिएको तथा भान्सा नछुन चेतावनी दिइएको उल्लेख छ। उक्त व्यवहारलाई जातीय छुवाछूत र विभेदको रूपमा लिइएको छ।

घटनापछि पीडित पक्षले दोषीमाथि कारबाहीको माग गर्दै कानुनी प्रक्रिया अघि बढाएको हो।

कानुनी प्रक्रिया सुरु

जाहेरी दर्ता भएसँगै अब घटनाको सत्यतथ्य छानबिन गरी आवश्यक कारबाही प्रक्रिया अघि बढाइने प्रहरीले जनाएको छ।

पीडित पक्षले जातीय तथा अन्य छुवाछूत तथा भेदभाव (कसूर र सजाय) ऐन, २०६८ अनुसार दोषीलाई कडा सजाय र क्षतिपूर्ति उपलब्ध गराउन माग गरेका छन्।

यस घटनाले पोखरामा जातीय विभेदसम्बन्धी बहस पुनः चर्किएको छ भने अब अनुसन्धानले कस्तो निष्कर्ष निकाल्छ भन्ने विषय चासोको केन्द्र बनेको छ।

Leave a Reply

Your email address will not be published. Required fields are marked *