बिहि, मंसिर ४, २०८३
Thu, November 19, 2026
Shadow

गैरकानुनी रूपमा सत्ता हत्याउने प्रयास असफल— भेनेजुएलाका राष्ट्रपति निकोलस मडुरो

काराकस —फागुन २७।

भेनेजुएलाका राष्ट्रपति निकोलस मडुरोले आफ्नो सरकारप्रति बफादार रहेको भन्दै सेनाको प्रशंसा गरेका छन् । राष्ट्रपति कार्यालयबाहिर जम्मा भएका समर्थकलाई सम्बोधन गर्ने क्रममा उनले विपक्षी नेता खुवान गुआइडोलाई ‘अमेरिकाको कठपुतली’ भएको आरोप लगाए ।

मडुरोले भने, ‘उनीहरूले सेनालाई सत्ता हत्याउन सहयोग गर्न आग्रह गरेका थिए । तर सेनाबाट स्पष्ट जवाफ पाए ।’ उनले आफूबाट गैरकानुनी रूपमा सत्ता हत्याउन खोज्नेहरू परास्त भएको बताए । मडुरो आफ्ना पूर्ववर्ती ह्युगो चावेजको मृत्युपछि सन् २०१३ यता सत्तामा छन् ।

अन्तर्राष्ट्रिय सञ्चारमाध्यमका अनुसार मडुरो र विपक्षी नेता गुआइडोकोआह्वानमा राजधानी काराकसमा परस्पर विरोधी प्रदर्शनहरूको आयोजना गरिएको छ । देशका थुप्रै भागमा बिहीबारदेखिको विद्युत् कटौती जारी छ । पछिल्ला प्रदर्शन भइरहँदा राजधानी कराकसका सडकमा सुरक्षाकर्मीको बाक्लो उपस्थिति थियो । विपक्षी प्रदर्शनकारीले प्रहरी दबाबको सामना गर्दै उनीहरूलाई ‘हत्यारा’ को संज्ञा दिइरहेका थिए ।

सभालाई सम्बोधन गर्दै विपक्षी नेता गुआइडोले ‘छिट्टै राजधानीमा आयोजना गरिने ठूलो सभा’का लागि समर्थन जुटाउन देशव्यापी भ्रमणमा जाने बताए । उनले भने, ‘हामी पूरै भेनेजुएला कराकसमा हुनेछौं किनभने अब हामी सबै एकजुट हुन आवश्यक छ । भेनेजुएलामा पछिल्ला वर्षहरूमा आर्थिक संकट गहिरिएको छ ।

(कान्तिपुर दैनिक)

Leave a Reply

Your email address will not be published. Required fields are marked *