शुक्र, मंसिर ५, २०८३
Fri, November 20, 2026
Shadow

खाजा खान गएर होटल मालिक्नीलाई नै लुटपाट गरेर भागेका युवक पक्राउ

खाजा खाएको होटलमा नै लुटपाट गरेर फरार रहेका एक व्यक्तिलाई बाँके प्रहरीले पक्राउ गरेको छ ।कैलालीको चुरे गाउँपालिका-५ खानीडाँडास्थित एक होटलमा खाजा खान गएको बेला होटल सञ्चालिकालाई नै लुटपाट गरेर फरार रहेका व्यक्तिलाई बाँके प्रहरीले पक्राउ गरेको हो ।

पक्राउ पर्नेमा कालिकोटको रास्कोट नगरपालिकाको वडा नम्बर १ घर भएका ३५ वर्षीय प्रकाश शाही छन् ।

जिल्ला प्रहरी कार्यालय बाँकेका अनुसार शाहीले कैलालीको खानीडाँडामा खाजा खान गएको होटलकी सञ्चालिकालाई बदामको जुसमा नशालु पदार्थ मिलाएर खुवाइ बेहोस् बनाएर ३ लाख २० हजार रुपैयाँ बराबरको २ तोलाको सुनको सिक्री लुटेर फरार भएका थिए ।

जिल्ला प्रहरी कार्यालय कैलालीको सूचनाका आधारमा बाँके प्रहरीले उनको खोजी शुरु गरेको थियो । खोजीका क्रममा बाँकेको कोहलपुर नगरपालिका-३ किरणनालामा लुकिछिपी बसेको अवस्थामा फेला पारी पक्राउ गरिएको प्रहरीले जानकारी दिएको छ ।

पक्राउ परेका शाहीबाट नगद ५९ हजार रुपैयाँ र भे४प ९५२५ नम्बरको मोटरसाइकल समेत बरामद गरिएको प्रहरीले जानकारी दिएको छ ।

पक्राउ परेका शाहीमाथि थप अनुसन्धान भइरहेको जिल्ला प्रहरी कार्यालय बाँकेले जानकारी दिएको छ ।

Leave a Reply

Your email address will not be published. Required fields are marked *