आइत, मंसिर ७, २०८३
Sun, November 22, 2026
Shadow

भारतका विदेश सचिव हर्षवर्द्धन शृङ्गला दुई दिने औपचारिक भ्रमणका लागि आज नेपाल आउँदै

 भारतका विदेश सचिव हर्षवर्द्धन शृङ्गला दुई दिने औपचारिक भ्रमणका लागि बिहीबार नेपाल आउँदैछन् ।

उनी विशेष विमान मार्फत बिहान १० बजेपछि काठमाडौँ आउने कार्यक्रम तय भएको परराष्ट्र मन्त्रालयकी प्रवक्ता सहसचिव सेवा लम्सालले जानकारी दिएकी छन् ।

परराष्ट्र सचिव भरतराज पौडेलेको निमन्त्रणमा उनी नेपाल भ्रमणमा आउन लागेका हुन् । विगतका उच्चस्तरीय भ्रमणको निरन्तरताकै रुपमा हर्षवर्द्धनको भ्रमण रहेको प्रवक्ता लम्सालले बताइन् ।

भारतीय विदेश सचिव हर्षवर्द्धन दुई दिन नेपालमा रहने छन् । भ्रमणको पहिलो दिन बिहीबार दुई देशका सचिवबिच द्विपक्षीय वार्ता हुनेछ । यस्तै सहयोगका विविध क्षेत्रबारे छलफल हुने प्रवक्ता लम्सालले जानकारी दिइन् ।

नेपाल र भारतबिच सीमा विवाद चर्किएपछि दुई देशको उच्च कूटनीतिक तहमा वार्ताको शृङ्खला सुरु भएको संकेतका रुपमा हर्षवर्द्धनको भ्रमणलाई लिन सकिने विश्लेषण छ ।

लिपुलेक, लिम्पियाधुरा र कालापानी क्षेत्र समेटेर नेपाल–भारत दुवैले नयाँ नक्सा जारी गरेपछि उत्पन्न विवादपछि कूटनीतिक तहमा औपचारिक भेट तथा छलफल हुन लागेको हो ।

भारतीय विदेशसचिवले बिहीबार नै राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग शिष्टाचार भेट गर्ने तयारी छ ।

उनले सत्तारुढ नेपाल कम्युनिस्ट पार्टी (नेकपा) कार्यकारी अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवासहितका नेतासँग पनि भेट गर्ने छन् । उनी भ्रमण सकेर शुक्रबार स्वदेश फर्किने छन् ।

Leave a Reply

Your email address will not be published. Required fields are marked *