बिहि, मंसिर ४, २०८३
Thu, November 19, 2026
Shadow

नेपाल राष्ट्र बैंकले कोरोना भाइरसका कारण प्रभावित भएका ऋणीलाई ऋण पुर्नतालिकीकरण गर्न समय थप

नेपाल राष्ट्र बैंकले कोरोना भाइरसका कारण प्रभावित भएका ऋणीलाई ऋण पुर्नतालिकीकरण गर्न समय थप गरेको छ ।

राष्ट्र बैंकको यस्तो व्यवस्थाले पिडामा परेका आम ऋणीलाई राहत पुगेको छ । राष्ट्र बैंकले हालै चालू आर्थिक वर्षको मौद्रिक नीतिको अर्धवार्षिक समिक्षा गर्दै यस्तो व्यवस्था गरेको हो ।

राष्ट्र बैंकले विषेशष्तः पर्यटन क्षेत्रका उद्योग व्यवसायहरुका लागि राहत उपलब्ध गराएको छ । प्रयाप्त मात्रामा पर्यटन क्षेत्र अझै संचालन हुन नसकेकाले यस क्षेत्रले अझै लय लिन सकेको छैन । त्यसैले राष्ट्र बैंकले यस क्षेत्रको थप राहतका लागि २०७८ साल असार मसान्तसम्मका लागि लागि पुनर्तालिकीकरण गर्ने सुविधा उपलब्ध गराएको हो ।

पुनर्तालिकीकरण गर्दा ऋणीले कुल ब्याज बक्यौताको ५ प्रतिशत ब्याज भुक्तान गरेको हुनुपर्ने व्यवस्था राष्ट्र बैंकले गरेको छ । यसअघि कुल ब्याज बक्यौताको १० प्रतिशत ब्याज भुक्तान गरेको हुनुपर्ने व्यवस्था थियो । कोरोनाका कारण अहिले पर्यटनमा मुख्य मानिने होटल व्यवसाय क्षेत्र पूर्ण रुपमा प्रभावित हुँदा संचालनमा रहेका अधिकांश होटलहरुको आम्दानी घटेको छ । होटल व्यवसायले आफ्ना कर्मचारी धान्न पनि धौ धौ परेको छ । राष्ट्र बैंकले लिएको नीतिले व्यवसायीक निरन्तरता दिन र कोभिडको असरबाट माथि निस्कन सहयोग पुग्ने व्यवसयीहरुको भनाई छ ।

राष्ट्र बैंकले यसपालीको मौद्रिक नीतिको समिक्षामा खासै ठुलो राहतको प्याकेज भने ल्याएन । यो मौद्रिक नीति आउँदानै धेरै क्षेत्रलाई सम्बोधन भएकाले अहिले केही क्षेत्रलाई मात्रै लक्षित गरिएको मौद्रिक नीतिको समिक्षा गर्दै राष्ट्र बैंकका गभर्नर महाप्रसाद अधिकारीले बताएका थिए ।

त्यसैगरी, राष्ट्र बैंकले कोभिड प्रभावित व्यवसायीको धितो आगामी असार मसान्तसम्म लिलामी तथा कालोसूचीमा राख्न नपाउने व्यवस्था समेत गरेको छ । यस व्यवस्थाले पनि ऋणीलाई थप राहत पुगेको छ । राष्ट्र बैंकले केही वर्षयता देखि नै बैंक तथा वित्तीय क्षेत्रले प्राथमिक प्राप्त क्षेत्रमा लगानी गर्न सीमा तोकेको छ । यस्तो सीमा बैंकहरुले पूरा गरे कि गरेनन् भन्ने समेत अध्ययन गर्ने राष्ट्र बैंकले जनाएको छ । साथै यस्तो ऋण दुरुपयोग भएको पाइएमा कारवाहीलाई थप प्रभावकारी बनाइने मौद्रिक नीतिको समिक्षामा भनिएको छ ।

Leave a Reply

Your email address will not be published. Required fields are marked *