शनि, मंसिर ६, २०८३
Sat, November 21, 2026
Shadow

चुनाव तोकिएकै मितिमा हुन्छ : प्रधानमन्त्री

प्रधानमन्त्री केपी शर्मा ओलीले तोकिएको मितिमै चुनाव हुनेमा ढुक्क हुन आग्रह गरेका छन् ।

अखिल नेपाल राष्ट्रिय स्वतन्त्र विद्यार्थी युनियनको केन्द्रीय कमिटीद्वारा आयोजित बृहत कार्यकर्ता भेलालाई सम्बोधन गर्दै उनले चुनाव नहोला कि भनेर भ्रममा नपर्न सबैलाई आग्रह गरेका हुन।

‘वैशाखमा प्रतिनिधि सभाको नयाँ निर्वाचन हुन्छ। कतिपयले भ्रम फैलाउन खोजिरहेका छन् चुनाव हुँदैन भनेर, तपाइँहरु भ्रमको पछि नलाग्नुहोस्’, उनले भने, ‘चुनाव वैशाख १७ र २७ गते हुन्छ।’

उनले चुनाव हुँदैन कि भनेर भ्रममा नपरी तयारीमा जुट्न समेत आग्रह गरे ।

उनले संवैधानिक इजलासलाई संसद् पुनर्स्थापना हुन नसक्ने जवाफ दिएको समेत बताए । मरेको संसद् ब्यूँताइ पाउँ भनेर सर्वोच्चमा परेका मुद्दाका जवाफ दिएर आएको उनले बताएका थिए ।

उनले संसद विघटन भइसकेको हुँदा अब पुनस्थापना नहुने ठोकुका गरे । आफ्नै पार्टीभित्रका नेताहरुले सरकारको काम गर्न नदिएको आरोप दोहोर्‍याए।

ओलीले पार्टीविरुद्ध ३ सय १५ बैठक भएकोमध्ये २ सय ८० बैठक खुमलटारमा बसेको दावी गरे । उनले प्रचण्डले पार्टीविरुद्ध अगेनाको डिलमा समेत बैठक बसेको उल्लेख गरे ।

पार्टीका नेताहरु कसरी सरकारलाई असफल पार्न सकिन्छ भन्ने किसिमले मात्रै बैठकमा बस्ने गरेको दावी गरे । ओलीले बितेका ३ वर्षमा पार्टी गतिशील नभएको र अहिले आएर अनेरास्ववियु गतिशील भएको उल्लेख गरे ।

प्रधानमन्त्री ओलीले राष्ट्रपतिको अपमान गर्नेहरुलाई लाज हुनुपर्ने बताए । उनले भने,“देशले पहिलोपल्ट महिला राष्ट्रपति पाएको छ । गरिमामय, जिम्मेवार ढङ्गले व्यवहार गर्ने, सालिन र भद्र महिला जसमा असाधारण देशभक्ति छ ।”

Leave a Reply

Your email address will not be published. Required fields are marked *