शनि, मंसिर ६, २०८३
Sat, November 21, 2026
Shadow

‘कोभिड १९ को संक्रमित बढ्दै जाँदा फेरि लकडाउन हुने डरले पनि बुकिङ नगरेको हुनसक्छ।’

सामान्य अवस्थाभन्दा करिब ५० प्रतिशत मात्रै उडान हुँदा पनि दशैँलक्षित प्रि–बुकिङ हुन नसकेको हो।

हवाइ व्यवसायीले ६ महिना बन्द रहेको आन्तरिक उडान दशैँको समयमा रौनक आउने विश्वास गरे पनि प्रि–बुकिङ हुनसकेको छैन। हाल करिब ५० प्रतिशत मात्रै उडान हुँदा पनि फुल अकुपेन्सी हुनै गाह्रो रहेको व्यवसायी बताउँछन्।

पछिल्लो समय कोभिड–१९ का संक्रमित बढ्दै जाँदा मानिसहरुले यात्रा गर्न अनिच्छा देखाएका छन्। अत्यावश्यक मानिस मात्रै बाहिर जाँदा हवाइ कम्पनीलाई यात्रु पाउन मुस्किल रहेको छ।

सरकारले दशैँ तिहारमा सकेसम्म जुन ठाउँमा छौँ, त्यही बस्न आग्रह गरेको छ। हरेक दशैँमा उपत्यका छाडेर जाने लाखौं भए पनि यो वर्ष धेरै नजाने व्यवसायीको आँकलन रहेको छ।

‘सरकारले दशैँमा सकेसम्म बाहिर नजानु। जहाँ छौँ, त्यही भर्चुअल माध्यमबाट आशीर्वाद लिनु भनेको छ’, यति एयरलाइन्सका सुरक्षा प्रमुख तथा प्रवक्ता सुदर्शन बर्तौलाले भने, ‘कोभिड १९ का संक्रमित पनि बढिरहेको र सरकारले पनि बाहिर नजान आग्रह गर्दा हवाइ यात्रु नभएका हुन्।’

बर्तौलाले अक्टोवर अन्तिमसम्म बुकिङ खुल्ला गरेको भए पनि यात्रुहरु बुकिङ नगरेको बताए।

‘हामीले दशैं लक्षित अक्टोबर अन्तसम्मको लागि बुकिङ लिएका छौँ’, उनले भने, ‘कोभिड १९ को संक्रमित बढ्दै जाँदा फेरि लकडाउन हुने डरले पनि बुकिङ नगरेको हुनसक्छ।’

सरकारले देशभर एकैपटक लकडाउन नभए पनि हस्पिटलमा संक्रमित राख्ने ठाउँ नभए सम्बन्धित पालिकामा लकडाउन वा निषेधाज्ञा हुनसक्ने बताएको छ। कोभिड १९ का संक्रमित दैनिक ५ हजारसम्म देखिन थालेपछि मानिस यात्राको लागि निरुत्साहित भएका छन्।

हवाइ कम्पनीहरुले अन्य समयको तुलनामा हवाइ भाडा कम हुँदा पनि यात्रुको संख्या बढ्न नसकेको बताए। हवाइ व्यवसायीले लामो दूरीका बसमा भाडा बढेको र हवाइ यात्राको तुलनामा असुरक्षित हुँदा हवाइ यात्रु बढ्ने आँकलन रहेको थियो।

Leave a Reply

Your email address will not be published. Required fields are marked *